Знаеш ли да чуваш тајна? - Софи Кинсела

Лесен, разбирлив стил кој ќе те натера да помислиш дека разговараш со ликовите од книгата. Те тера да се смееш на цел глас додека читаш сам во соба. Ја фаќаш книгата и не можеш да се одвоиш од неа, ни за јадење, ни за пиење, ни за одење во wc. Како да гледаш некоја романтична комедија што трае и трае.

Не знаеш дали повеќе го сакаш главниот лик или писателката или пак тие две личности можеби се една...

Главниот женски лик во оваа книга е толку уникатен, толку весел, толку позитивен што едноставно нема да можете да речете дека не сте ја засакале после ови 300 - 400 страници.

Таа во напад на паника, мислејќи дека ќе се сруши авионот, на тотален странец кој седи до неа му ги кажува своите „најмрачни тајни“. Не, тоа не се страшни големи тајни поради кои некој може да ве мрази или да одите во затвор. Тоа се мали, смешни тајни кои немаат никакво значење за никого освен за неа. Откако ситуацијата со авионот завршува во најдобар ред, таа е засрамена, но од друга страна се теши дека сепак не е толку страшно бидејќи човекот кој седеше до неа нема никогаш повеќе да го види.

Сè додека неколку недели подоцна таа не го запознае својот нов шеф... кој сега случајно знае дека таа истура кафе во цвеќето на нејзината колешка која не може да ја поднесе, дека го лаже своето момче за бројот на својата облека, т.е вели дека носи неколку броја помала долна облека, дека има соништа кои некогаш ја вклучуваат нејзината најдобра пријателка на малку невообичаен начин . . .

П.С. Те сакам - Сесилија Ахерн

Една неповторлива љубовна приказна која остава без здив. Повторно една од тие книги кои Ве тераат 20 минути да се смеете на глас, а 20 минути да плачете како дете.

Нејзиниот маж во најтешките моменти и денови кога згаснува неговиот живот пишува писма за неа кои таа треба да ги чита секој први ден од месецот по неговата смрт. Не, не ги отвора порано од договореното иако умира од желба да го стори тоа и да ги прочита последните зборови на својот сакан туку внимателно ги почитува неговите упатства.

Како една млада вдовица да продолжи да живее кога на овој свет повеќе го нема нејзиниот сакан? Низ многу ретроспективи во книгата се гледа колку многу тие се сакале, какви убави моменти поминувале заедно, а потоа се опишани и моментите по неговата смрт, ужасни и тешки за неа.

Таа плаче додека солзите не пресушат, се смее во моменти на очај кога знае дека не може да го врати назад, таа се обидува да се затвори сама изолирана од светот и да тагува... Но нејзините пријателки и роднини не дозволуваат така да живее...

Нема да откривам повеќе на оние кои, не ја прочитале, само ќе им кажам дека мораат веднаш да дојдат до неа!

Клучот на алхемичарот - Кристина Брамбиља

Еден моќен талисман скриен во утробата на Најведрата Република.

Еден алхемичар решен да го присвои .

Едно смело девојче кое би сакало да биде на друго место.

Девојче што ќе ја доживее најнепредвидливата авантура што некогаш ја виделе венециските сокаци.

Не му се случува секому, да се разбуди еден ден и да открие дека неговиот татко е волшебник и алхемичар. Дека за него работи и му е подреден еден намќорест гаргол кој сака повторнода биде грандиозен крилест лав. Дека градот во кој само што си се доселил, Венеција, е лавиринт од вода и магла што го крие најскапоцениот и најмоќниот клуч во историјата на магијата. На Лучила и се случи сето ова. А ова е само почеток...

Чекори за сеќавање - Николас Спаркс

Дали уште еднаш Николас Спаркс успеа да создаде маж и дечко која секоја девојка би посакала да го има? Па нормално дека успеа, а кога не успеал?! Ова е уште една приказна во негов стил, ова е уште еден пат кога по неговата книга ќе се сними филм, ова е уште еден пат кога тој ќе нѐ доведе до солзи и ќе нѐ натера да посакаме да можеме да промениме нешто.

Накратко и воопшто онолку колку што е дозволено на оваа страна, станува збор за девојка која е убаво воспитана, наивна, искрена, многу мила и позитивна. Нејзиниот татко работи во локалната црква што уште повеќе влијае и придонесува за нејзиниот мирен карактер. Во истата приказна имаме еден бунтовник кој изгледа дека нема никакво воспитување, не почитува ништо ниту пак се гржи за нечии чувства освен за своите. Кога овие два лика ќе ги споиме во една приказна добиваме една чудесна сторија.

Мајсторски, вешто, уникатно, нежно, трогателно... ИСКЛУЧИТЕЛНО! Не разговараме воопшто за тоа дали треба или не треба да ја прочитате оваа книга бидејќи ова прашање повеќе нема да го поставуваме за книгите чиј автор е Николас Спаркс.